04.06.2014 - 15:37

Í byrjun sumars – opiđ hús

« 1 af 3 »

Í byrjun sumars – opið hús

Nú eru melrakkarnir í Eyrardal komnir í sumargírinn og þeim hefur einnig fjölgað. Til liðs við Midge og Jónas eru þau Genka Yordanova og Þórir Halldórsson komin aftur til sumarstarfa og svo einn nýliði Elín Andrea Vikse Helgadóttir. Fyrsti sjálfboðaliðinn kom til liðs við okkur s.l. sunnudag og verður á Melrakkasetrinu næstu tvær vikurnar. Fleiri munu bætast við um helgina og í næstu viku enda fyrsta rannsóknarferðin í Hornvík áætluð laugardaginn 14. júní. Þá mun Ester Rut halda norður ásamt 6 sjálfboðaliðum og  dvelja þar við rannsóknastörf í eina viku.

 

Í byrjun júní breyttist opnunartími Melrakkasetursins og er nú opið frá kl. 9:00 til kl. 20:00 alla daga vikunnar nema föstudaga og laugardaga, en þá er opið til kl. 22:00.

Í hádeginu verður að venju boðið upp á grænmetissúpu og núbakað brauð, einnig verður hægt að fá plokkfisk og rúgbrauð flesta daga. Nýbakaðar vöfflur og heimabakaðar kökur verða að sjálfsögðu í boði allan daginn.

 

Opið hús

 

Mánudaginn 9. júní verður opið hús í Melrakkasetrinu í tilefni þess að um þær mundir verða liðin fjögur ár frá opnun Melrakkasetursins.

Að venju verða veitingar í boði húsins. Boðið verður upp á afmælistertu frá Gamla bakaríinu og sumardrykkinn Mix frá Ölgerðinni ásamt heimabökuðum kökum og kaffi.

Frítt verður á sýninguna, leiktæki fyrir börn og fullorðna verða til staðar og hver veit nema eitt og eitt tónlistaratriði læðist inn á milli.


 

Vefumsjón